The Soonism show with T i T o - E01

T i T o is HERE

Enjoy and tell us what do u think

دي مش مجرد مكالمة تليفون!

Soon & TiTo 

Phone call

سكوت..هنصور قتيل!

نفسك تقتل القتيل وتمشى فى جنازته؟

مخنوق من نفسك وعايز تظلمها وتطلع عينيها؟

عايز بجد تبقى مجرم؟


 

يبقى لازم تعرف إن أهم خطوة فى طريقك لارتكاب جريمة هى "السكوت"

وعشان الدواعى الامنية اقطع لسانك اضمن !

بالحاجتين دول استحالة حد ممكن يمسك عليك حاجة

لا بصمات ،ولا فيديو يصورك ،ولا شهود ،ولا حتى تنسى بطاقتك بالصدفة فى موقع الجريمة

وبعيد عن الكلام النظرى وحشو العقول نيجى للكلام العملى 

وخليك معايا فى المثال ده:


سواق ميكروباص حمل أعداد زيادة وقاعد يدفس فى ركاب لدرجة إن الميكروباص كان بيبوظ ركاب،وفوق كده سايق بسرعة كبيرة متخيل نفسه سايق طيارة ومش مراعى إنه مركب معاه بنى آدمين وقاعد يشيل ويهبد فيهم وهما من طيبتهم مش بيتكلموا ،وعشان تكمل ويبقى عمل كل الغلط اللى نفسه فيه قاعد يتكلم فى الموبايل،وكانت النتيجة ان الميكروباص اتقلب فوق دماغ اللى فيه وكل الركاب ماتوا!


طبعا السواق يستاهل الشنق لانه كان طماع لما ركّب أعداد زيادة وكان مستهتر بحياة الناس ،وظلمهم زيادة لما استهتر اكتر واتكلم فى الموبايل

الركاب دول ذنبهم ايه ؟

الركاب زيهم زى السواق .. الركاب ظلموا نفسهم واتسببوا فى قتل نفسهم لما "سكتوا" على الغلط من الاول

لان السكوت على الظلم .. ظلم
السكوت على الغلط ..غلط

حتى لو كان غلط بسيط ممكن عواقبه تبقى كبيرة وفجأة نلاقى نفسنا "متسببين" فى جريمة

السكوت بقى جوانا ،أو بمعنى أصح أوقات كتير بنطنش وبنكبّر وبنمشّى أمورنا والموضوع بقى عادى وماعدناش بنشوف إن السكوت غلط

وخلقنا ثقافة "ياعم كل عيش وربى عيالك"

ودى ثقافة لازم نغيرها لأنها سبب فى مصايب كتير ولازم نرجع تانى نحس بخطورة الموضوع،إننا لما بنسكت عن غلط إحنا شايفين إنه مش بيمسنا ومش هيضرنا هيضر صاحبه بس بنبقى غلطانين...الغلط لما "بنسكت" عليه بيكبر وهيضرنا كلنا .. مش بس كده ،وبنبقى كمان إحنا اللى كبرناه بسكوتنا وفى الآخر نشتكى من
ظروفنا


دلوقتى لو شوفت واحد بيقتل وسكتّ.. بقيت قاتل زيّى زيه، آه أنا ماقتلتش لكن "سكتّ" وسبت الراجل يتقتل، وكمان سبت القاتل حر يقتل فى أى حد،لغاية ما في يوم هلاقيه بيقتل عيل من عيالى .. ساعتها هقول ياريتنى كنت اتكلمت


لو انت شوفت واحد بيعاكس بنت أيا كان شكلها أو لبسها احنا متفقين ان المعاكسة حاجة غلط ..لو انت سكت على الغلط والولد اللى بيعاكس ماحدش وقفله ممكن يتجرئ وتانى يوم يتحرش بيها وبعدين يخطفها وبعدين يغتصبها


تخيل ان سكوتك أول مرة ممكن يؤدى للنتايج دى .. طب ليه نحمل نفسنا "اخطاء غيرنا بسكوتنا"؟ ليه نظلم نفسنا واحنا اصلا مش ناقصين؟؟


احنا كويسين وفينا ناس مش بتقدر تسكت على الغلط بس لازم نعمم الثقافة دى..الموضوع مش دخيل علينا سكوتنا على الغلط هو اللى دخيل علينا


لكن فى حاجة .. لو قررنا اننا نبطل سكات ونتكلم يبقى ناخد بالنا من اسلوب كلامنا لانعنف حد ولا نمسك فى خناق حد، لكن مانسكتش على الغلط .. يا إما نصلحه بإيدينا أو نتكلم مع الغلطان باسلوب مؤدب ،يا إما لو ماقدرناش خالص يبقى على الاقل بيننا وبين نفسنا نبقى كارهين الغلط، وده اضعف حاجة

عند محطة الأتوبيس

بعد ما نزل من البيت زي كل يوم عشان يروح الكلية .. بدأ رحلة المواصلات بالوقوف عند محطة الأتوبيس .. بيتفرج على اللي رايح و اللي جاي .. ده واحد بيعاكس واحدة بإصرار شديد و ماحدش بيكلمه .. و  دي بترمي زبالتها على الأرض بكل بساطة .. و السيد المحترم راكب " البي إم" و بيركن صف تاني في الشارع اللي عرضه يكفي عربيتين بالعافية!

وصل الأتوبيس بسلام ... و بدأت الناس تركب .. و في الطريق الكمسري طلع سجاره و ولعها و بدأ يدخن .. فيه ناس عادي مش فارق معاها الموضوع .. و ناس متضايقة بس حطت لسانها جوه بقها و سكتت .. و ناس هاتتجنن من الريحة و مش طايقة نفسها (طبعا الناس دي هما المدخنين اللي ماسكين نفسهم بالعافية من توليع سيجارة هما كمان .. تخيل لو الناس دول كل واحد ولع سيجارة!)
و وسط كل ده .. صاحبنا الطرطور واقف بيتفرج .. رغم انه مش مدخن .. و متعلم .. وعارف بلاوي التدخين .. وعارف الأماكن الممنوع فيها التدخين!

بعد الرحلة اللطيفة في الأتوبيس .. وصل صاحبنا للكلية .. دخل المدرج .. و أثناء المحاضرة حاول الدكتور يلطف الجو و يخفف ضغط المحاضرة و استغل ان سيرة الحكومة جت في الموضوع  .. و بدأ يلمح على الفساد و تخلف المسؤولين .. و يتريق على حال البلد و الناس .. و طبعا الطلبة تتضضضضححححك .. و صاحبنا يضحك.. لحد ما عينه دمعت.

 خلصت المحاضرة .. و صاحبنا روح بيته.

تاني يوم حصل نفس السيناريو لكن مع اختلافات "صغننه" .. مثلا اللي كان بيعاكس امبارح جاب صاحبه يعاكس معاه .. و الكمسري اللي كان بيضرب سجاير زاد عليه واحد واقف على الباب (قال يعني كده الدخان مش هايدخل جوه الأتوبيس)

و في يوم من الأيام  رجع البيت .. لقى الست الوالدة بتشتم في شباب اليومين دول و في البلد و اللي فيها

فسألها
- ايه اللي حصل؟!

قالت له:
-  شوية عيال مش متربية عاكسوا أختك النهارده و قالولها كلام سافل!!

سألها بحماس:
- فين ؟ و امتى ؟!

قالت له:
النهارده الصبح .. عند محطة الأتوبيس اللي جنبنا !!



طبعا صاحبنا سمع الكلمة من هنا و جت له حالة ذهول ... تـنـح ..  و تقريبا مابقاش سامع ولا شايف قدامه .. جه في دماغه حاجات كتير .. 100 فكرة في الثانية ..  دخل أوضته من غير ما يقول ولا  كلمة.. جري على الشباك اللي بيطل على محطة الأتوبيس .. فضل واقف كأنه مستني حاجه تحصل .. و حصل اللي هو كان مستنيه .. 3 عيال في ثانوي ماشيين ورا بنت بيعاكسوها .. ما استناش يكمل المشهد زي كل مرة .. نزل و راح ناحية المحطة و هو بيبص يمين و شمال .. بيبص على الناس اللي بتتفرج على المنظر كأنه فيلم خيالي معروض قصادهم أو كأنه تمثيل" كده و كده" ...

راح على العيال اللي بتعاكس.. و قال لهم : بتعملوا ايه ..

العيال نفضوا و كملوا اللي بيعملوه ..

صاحبنا ما سكتش و كرر السؤال و في الوقت ده الناس بدأت تنتبه أن فيه إنذار خناقة هاتبدأ .. و بدأ كل واحد يقرب من اللي بيحصل بس رجل ورا و رجل قدام .. الكل بيفكر الأول

رد العيال : انت مالك انت خليك في حالك !

صاحبنا مسك واحد فيهم و قال له : عيب اللي انتوا بتعملوه ده .. اتلموا بدل ما تروحوا على القسم !

رد عليه واحد منهم بشتيمة و قال له: هاتودينا ازاي القسم بقى؟!

في اللحظة دي كان اللي بيشاوروا عقلهم وصلوا و بقى حوالين العيال 3 رجالة طول بعرض كمان مع صاحبنا .. و من غير ما صاحبنا يشرح الموضوع اخدوا العيال بالعافية في تاكسي و طلعوا على القسم! لأنهم كانوا شايفين اللي بيحصل من بدري!

صاحبنا بص حواليه و هو مش مصدق .. و سأل نفسه في اندهاش : " ببساطة كده؟!"

اتــكــلــم !

اتــكــلــم!

اوعى تعمل ميت

شايف حاجه غلط؟
سامع كلام ما ينفعش؟


اتكلم!
تسكت ليه؟
اتكلم .. يمكن تكون انت السبب في التغيير


اتكلم .. حس إنك تقدر
اتكلم .. حس انك قوي


لما تشوف غلط ...
اتكلم!
اوعى تعمل ميت!
اوعى تكون طرطور!


اتكلم !!


 ●-●-●-●-●-●-●-●-●-●-●-●-●-●-●-●●-●-●-●-●-●-●-●-●

تـحـمـيـل مـجـلـتـنـا The Soonism Mag مجلة مختلفة .. من غير ملل ولا تطويل -  العدد التاني - فبراير 2010
من هنا http://www.mediafire.com/?bz1qwnnwigj  

●-●-●-●-●-●-●-●-●-●-●-●-●-●-●-●●-●-●-●-●-●-●-●-●
  
Watch The Soonism show on YouTube ((The new episode is coming soon ))
http://www.youtube.com/thesoonism

●-●-●-●-●-●-●-●-●-●-●-●-●-●-●-●●-●-●-●-●-●-●-●-●

Become a fan NOW
http://www.facebook.com/pages/Soul-of-our-Nation-SOON/118028111057?ref=ts

●-●-●-●-●-●-●-●-●-●-●-●-●-●-●-●●-●-●-●-●-●-●-●-●

SOON - Feb2010 activity اتــكــلــم .. اوعى تعمل ميت

اتكلم !

 اوعى تعمل ميت

 

SOON 2010

Promo February 2010

Facebook:

http://www.facebook.com/video/video.php?v=302114573166&oid=86054666057&saved

 YouTube:

Soonism Time

بصينا يمين و شمال..

لاقينا كل الناس بتنفخ و قرفانه..

الكل بيقول فيه حاجه غلط ... كفاية كده .. زهقنا و طهقنا ..

و قبل ما نعمل زيهم ... فكرنا ..

إحنا ليه كده؟؟

و هي ليه كده؟؟

إحنا ولاد البلد دي .. ليه حالنا بقى كده ؟؟ ليه ضايعين و تايهين و مش عارفين المشكلة فين؟؟

و هي بلدنا .. ليه شكلها بقى كده؟؟ ليه بقت مبهدلة و شكلها يغم النفس ؟؟ و ليه ناسها عاملين كده؟؟

بعد الأسئلة دي .. قلنا لنفسنا :

" البلد دي بلدنا إحنا .. إحنا شبابها ..

 و أهالينا خلاص .. مابقاش فيه حاجه جديدة يعملوها .. منهم اللي عمل اللي عليه .. و منهم اللي خربها !"

قررنا أننا نبدأ نغير نفسنا  .. بالتدريج .. و واحدة واحدة ...

أول ما نمسك المسؤولية .. هانخليها جنة

هي دي فكرتنا ..

هي دي عقليتنا ..

و هي دي السونيزم

BELIEVE IN SOONISM

A n t i - e c h o e s

خلاص..
مش هانقلد أي حد من غير تفكير..
مش هانقلد أي حاجه قبل ما نحسبه..
مش هانقلد خواجه من غير سبب..
مش هانقلد المغني ده و الممثلة دي..
مش هانبقى مجرد نسخة .. نسخة فيه زيها كتير في العالم كله!

مش هاننشر أي خبر نسمعه قبل ما نتأكد..
مش هاننشر خبر مالوش لازمه..
مش هاننشر كلام فاضي عن أي حد أو أي حاجه..
مش هانصدق أي كلام يتقال لنا قبل ما نفكر فيه..


هانخلق شخصيتنا المتميزة!
هانخترع الموضة بتاعتنا!
هانتأكد من أي معلومة أو أي خبر قبل ما ننشره
هانوقف أي حد عن نشر الإشاعات و الكلام الفارغ


مش هانبقى echoes
إحنا Anti-echoes


●-●-●-●-●-●-●-●-●-●-●-●-●-●-●-●●-●-●-●-●-●-●-●-●

تـحـمـيـل مـجـلـتـنـا The Soonism Mag مجلة مش عااااادية
من هنا http://www.mediafire.com/?ltytqg1tomn

●-●-●-●-●-●-●-●-●-●-●-●-●-●-●-●●-●-●-●-●-●-●-●-●

Watch The Soonism Show NOW on YouTube
http://www.youtube.com/thesoonism

●-●-●-●-●-●-●-●-●-●-●-●-●-●-●-●●-●-●-●-●-●-●-●-●

أول حلقة من سونيزم شو
http://www.youtube.com/watch?v=J9YdAEH_nec
http://www.youtube.com/watch?v=O0S8MkfR58k

We are SOON

S.O.O.N.

احنا مجموعة من المصريين .. شايفين حوالينا ناس كتير زينا .. ناس عايزين يغيروا مصر برضو .. لكن كل واحد له طريقة .. فيه ناس كبار .. أهالينا .. شايفين إن المشكلة في نظام الحكم و الريس و الوزرا و بيعملوا احزاب و يعارضوا الحكومة أو بيعملوا جرايد و برضو بيعارضو الحكومة .. و فيه ناس سنهم من سننا تقريبا .. بيعلنوا تمردهم طول الوقت بالمدونات و الدعوة لحملات مقاطعة وإضرابات .. لكن إحنا لينا تفكير مختلف .. شايفين أن أي واحد من المسؤولين اللي مش عاجبين معظم الناس كان مواطن عادي .. مايفرقش عننا حاجه .. كان بيغلط نفس الغلطات بتاعتنا .. و مع الوقت اترقى و بقى وزير لأي سبب بقى .. و الغلطات اللي كانت عنده قبل ما يبقى وزير كبرت معاه لما بقى وزير .... مش ده المهم ! .. المهم إنه بني آدم مصري زينا .. يبقى من الآخر .. لو عايزين نغير البلد دي .. لازم نغير البني آدمين .. لازم كل واحد فينا يبقى مسؤول قصاد نفسه إنه يغير الناس اللي حواليه .. في كل المجالات .. سلوك و ثقافة و تفكير اقتصادي و سياسي و حتى في نوع الموسيقى و الافلام و المسلسلات ! .. أيوه .. لازم يحصل غسيل مخ للمصريين .. لأن مافيش حاجه اسمها بلد كويسه و الشعب ضايع !.. مافيش حاجه اسمها شعب متحضر و البلد متخلفة .. مافيش حاجه اسمها دولة من العالم الأول و الشعب من العالم التالت !
علشان بلد تتغير .. لازم البني آدمين اللي فيها يتغيروا .. هي دي فكرتنا .. مالناش في السياسة .. لا حكومة ولا معارضة .. لينا في الحاجه اللي الكل تقريبا متفق عليها بس مش بيغيرها .. لينا في إن المصريين فيهم حاجه غلط و لازم نغيرها ..
إحنا روح أمتنا .. و هنغيرها بطريقتنا
S.O.O.N.
Soul of our Nation
روح أمــتــنــا

هانبقى موجودين بين الناس .. بنغيرهم بالتدريج .. من غير ما يحسوا .. مش منتظرين شهرة أو فلوس .. مش مستنيين حد يقول شكرا و ربنا معاكم .. و لا هنركز مع حد بيقولنا انتم بتحلموا .. كان غيركم أشطر !! .. مستنيين ناس عايزة تعمل حاجه .. ناس زهقت .. ناس مش عارفه مين الصح الحكومة ولا المعارضة؟!.. ممكن تكتشف في أي لحظة إن أقرب الناس ليك واحد مننا .. ممكن يكون أخوك .. جارك ... ممكن يكون أخوكي أو جارتك !

* شغلنا هايبقى كالآتي..
هنقسم نفسنا لمجموعة من الأنشطة ... و هنبدأ دلوقتي بنشاطين .. السلوك و الثقافة..
طيب ايه اللي هايحصل بالظبط .. المفروض ان اللي عايزينه يحصل اننا نغير تفكير الناس في أي حاجه ليها علاقة بالنشاطين دول .. اي حاجه ليها علاقة بالسلوك لازم نغيرها و اي حاجه ليها علاقة بالثقافة لازم تتغير..... و لاحظوا ان الثقافة مش قراية و بس و السلوك مش نضافة و خلاص! .. الاتنين موضعين كبااار اوي و ليهم تفريعات كتيره جدا..
اللي هايحصل ان كل مجموعة مسؤولة عن نشاط من النشاطين هتبدأ تعلن عن أفكار معينة هاتتنفذ و المطلوب من كل واحد هنا انه ينشر الفكرة و ينفذها بالطرق اللي هانقول عليها..


مبادئنا
1- ابدأ بنفسك!
2- كمجموعة ..مالناش في شغل السياسة. لكن كأفراد .. كل واحد حر !
3- ضد تشويه صورة مصر.
4- مافيش تمييز بين المصريين بأي شكل .. الكل مصري و بس.
5- مافيش ربط بين شخصية الواحد و طريقة كلامه .. يعني مش معنى إن واحد بيقول "نفض" و "افكس" يبقى مش محترم او دماغه فاضية!
6- إحنا جيل مميز .. مع احترامنا لأجيال أهالينا !